මිරිස්ස මුහුදු තීරයේදී ජපන් සහ රුසියානු ජාතික සංචාරකයින් දෙදෙනෙකු දියේ ගිලීමෙන් බේරා ගැනීමට වෙරළ ආරක්ෂක ජීවිතාරක්ෂකයින් සමත් වෙයි

2026 නොවැම්බර් මස 12 වන දින මිරිස්ස මුහුදු තීරයේදී දියේ ගිලීමේ අවදානමට ලක්වූ ජපන් ජාතික කාන්තා සංචාරකයෙකු සහ රුසියානු ජාතික පිරිමි සංචාරකයෙකු නිරුපද්‍රිතව බේරා ගැනීමට ශ්‍රී ලංකා වෙරළ ආරක්ෂක දෙපාර්තමේන්තුවේ ජීවිතාරක්ෂකයින් සමත් විය.

මුහුදේ පැවති ප්‍රබල දියවැල් හේතුවෙන් මෙම සංචාරකයින් දෙදෙනා දියේ ගිලීමේ අවදානමට ලක්ව ඇති අතර, ඒ පිළිබඳව අවධානය යොමු කළ වෙරළ ආරක්ෂක ජීවිතාරක්ෂකයින් කඩිනමින් ක්‍රියාත්මක වී ඔවුන් ආරක්ෂිතව ගොඩබිමට රැගෙන ඒමට කටයුතු කරන ලදී. අනතුරුව ඔවුන්ට මූලික ප්‍රථමාධාර ලබා දීමට ද කටයුතු කර ඇත.

මෙලෙස බේරාගත් ජපන් ජාතික සංචාරක කාන්තාව 25 හැවිරිදි වියේ පසුවන අතර, රුසියානු ජාතික සංචාරක පිරිමි පුද්ගලයා 34 හැවිරිදි වියේ පසුවේ. ඔවුන් දෙදෙනාම මේ වන විට සුරක්ෂිත තත්ත්වයේ පසුවන බව වාර්තා වේ.

මෙවැනි හදිසි අවස්ථාවන්හිදී වෙරළ ආරක්ෂක ජීවිතාරක්ෂකයින්ගේ කඩිනම් මැදිහත්වීම තුළින් වෙරළ තීරයන්හි සංචාරකයින්ගේ සහ මහජනතාවගේ ජීවිත ආරක්ෂා කිරීම සඳහා ශ්‍රී ලංකා වෙරළ ආරක්ෂක දෙපාර්තමේන්තුව අඛණ්ඩව කැපවී සිටියි.